– మాదాపూర్ రోడ్డు ప్రమాదంపై సంజుష్ వివరణ
హైదరాబాద్లోని మాదాపూర్ ఇనార్బిట్ మాల్ వద్ద ఆగస్టు 16న జరిగిన రోడ్డు ప్రమాదంలో 26 ఏళ్ల భారతి ముఖి మృతి చెందిన విషయం తెలిసిందే. ఈ ప్రమాదానికి కారణమైన లగ్జరీ స్పోర్ట్స్ కారును జనసేన పార్టీ రాజ్యసభ సభ్యుడు లింగమనేని రమేష్ కుమారుడు సంజుష్ నడిపినట్లు మాదాపూర్ పోలీసులు కేసు నమోదు చేసి, దర్యాప్తు కొనసాగిస్తున్నారు.
ఈ నేపథ్యంలో ప్రమాదంపై సంజుష్ తన వివరణను వెల్లడించారు. ప్రమాదం జరిగిన అనంతరం తాను ఘటనా స్థలం నుంచి పారిపోలేదని ఆయన స్పష్టం చేశారు. తీవ్రంగా గాయపడిన భారతి ముఖికి వెంటనే వైద్య సహాయం అందించాలనే ఉద్దేశంతో తన సొంత వాహనంలోనే ఆమెను ఆస్పత్రికి తరలించినట్లు తెలిపారు. ఆమెను కాపాడేందుకు తన వంతు ప్రయత్నం చేసినప్పటికీ, దురదృష్టవశాత్తూ ఆమె మృతి చెందడం తీవ్రంగా బాధించిందని పేర్కొన్నారు.
ప్రమాదం అనంతరం తానే స్వయంగా పోలీస్ స్టేషన్కు వెళ్లి ఘటనకు సంబంధించిన పూర్తి వివరాలను అధికారులకు వెల్లడించినట్లు సంజుష్ తెలిపారు. పోలీసుల దర్యాప్తుకు పూర్తిగా సహకరిస్తున్నానని, ఘటనకు సంబంధించిన వాస్తవాలను సమగ్రంగా పరిశీలించాలని కోరారు. ప్రమాద సమయంలో తాను మద్యం లేదా ఇతర మత్తు పదార్థాలు సేవించి వాహనం నడిపానా అనే అంశంపై పోలీసులు బ్రీత్ అనలైజర్, యూరిన్, బ్లడ్ పరీక్షలు నిర్వహించినట్లు సంజుష్ తెలిపారు. ఈ మూడు పరీక్షల్లోనూ నెగెటివ్ ఫలితాలు వచ్చినట్లు వెల్లడించారు. ఈ వైద్య పరీక్షల ఫలితాలను కూడా దర్యాప్తులో పరిగణనలోకి తీసుకోవాలని కోరారు.
భారతి ముఖి మృతి తనను తీవ్రంగా కలచివేసిందని సంజుష్ పేర్కొన్నారు. ఈ విషాద ఘటనపై తాను కూడా తీవ్రంగా చింతిస్తున్నానని తెలిపారు. మృతురాలి కుటుంబానికి తన ప్రగాఢ సానుభూతిని తెలియజేశారు. సాధ్యమైనంత మేర బాధిత కుటుంబానికి సహాయం చేయడానికి సిద్ధంగా ఉన్నానని చెప్పారు.
ప్రమాదానికి ముందు, ప్రమాదం జరిగిన సమయంలో, అనంతరం చోటుచేసుకున్న ప్రతి పరిణామాన్ని సమగ్రంగా పరిశీలించాలని సంజుష్ విజ్ఞప్తి చేశారు. సీసీటీవీ ఫుటేజీ, వైద్య పరీక్షల నివేదికలు, ఇతర ఆధారాలను పరిగణనలోకి తీసుకుని వాస్తవాలను నిర్ధారించాలని కోరారు.
ఈ ఘటనకు సంబంధించి పోలీసుల దర్యాప్తుకు తన వంతు పూర్తి సహకారం అందిస్తానని సంజుష్ స్పష్టం చేశారు. దర్యాప్తులో అవసరమైన ప్రతి సమాచారాన్ని అందించేందుకు సిద్ధంగా ఉన్నానని తెలిపారు. జరిగిన పరిణామాలపై తన బాధ్యతను తప్పించుకోకుండా చట్టపరమైన ప్రక్రియను గౌరవిస్తానని పేర్కొన్నారు.
చట్టవ్యవస్థ, న్యాయవ్యవస్థపై తనకు పూర్తి నమ్మకం, విశ్వాసం ఉందని సంజుష్ తెలిపారు. నిష్పక్షపాత దర్యాప్తు ద్వారా ఘటనకు సంబంధించిన వాస్తవాలు వెలుగులోకి వస్తాయని ఆశిస్తున్నానని పేర్కొన్నారు.
—