లెక్కలు అడిగితే సస్పెన్షన్లు, కేసుల పేరుతో బెదిరిస్తున్నారంటూ సభ్యుల ఆరోపణలు
యూనియన్ నిధులపై పారదర్శకత కోరుతున్న మహిళా కార్మికులు
ఫిలిం ఛాంబర్, ఫెడరేషన్ పెద్దలు జోక్యం చేసుకోవాలని డిమాండ్
హైదరాబాద్: తెలుగు సినీ అండ్ టీవీ ప్రొడక్షన్ మహిళా వర్కర్స్ యూనియన్లో అంతర్గత విభేదాలు తీవ్రరూపం దాల్చాయి. యూనియన్ అధ్యక్షురాలు లలిత వ్యవహారశైలిపై పలువురు సభ్యులు తీవ్ర ఆరోపణలు చేశారు. యూనియన్ ఆర్థిక వ్యవహారాలకు సంబంధించిన లెక్కలు అడిగిన తమను అవమానిస్తున్నారని, బెదిరింపులకు పాల్పడుతున్నారని, ఇష్టానుసారంగా సస్పెండ్ చేస్తున్నారని వారు ఆరోపించారు. ఈ మేరకు బంజారాహిల్స్ పోలీస్ స్టేషన్లో ఫిర్యాదు చేసిన అనంతరం హైదరాబాద్లో అత్యవసరంగా మీడియా సమావేశం నిర్వహించి తమ వాదనను వెల్లడించారు.
‘ప్రశ్నిస్తే అవమానిస్తున్నారు’
ప్రొడక్షన్ యూనియన్ సభ్యులు రేణుక, శైలజ, భారతమ్మ, ఆదిలక్ష్మి, అరుణ తదితరులు మాట్లాడుతూ అధ్యక్షురాలు లలితపై తీవ్ర ఆవేదన వ్యక్తం చేశారు. తమ ఓట్లతో అధ్యక్షురాలిగా ఎన్నికైన అనంతరం లలిత తమ పట్ల గౌరవం లేకుండా వ్యవహరిస్తున్నారని ఆరోపించారు. యూనియన్ సమావేశాల్లో లేదా ఇతర సందర్భాల్లో తమ సమస్యలను, సందేహాలను ప్రశ్నించినప్పుడు మీడియా ముందు చెప్పలేని విధంగా అసభ్య పదజాలంతో దూషిస్తున్నారని వారు పేర్కొన్నారు.
యూనియన్లోని సభ్యులందరికీ సమాన గౌరవం ఇవ్వాల్సిన బాధ్యత అధ్యక్షురాలిపై ఉందని, అయితే తమను కించపరిచేలా మాట్లాడటం బాధాకరంగా ఉందని అన్నారు. ఎలాంటి కారణం లేకుండా తనకు నచ్చని సభ్యులను సస్పెండ్ చేయడం ఎంతవరకు న్యాయమని ప్రశ్నించారు. ఏదైనా సభ్యుడు తప్పు చేస్తే కమిటీతో చర్చించి, వాస్తవాలు పరిశీలించిన అనంతరం నిబంధనల ప్రకారం చర్యలు తీసుకోవచ్చని తెలిపారు. కానీ అధ్యక్షురాలు తనకు నచ్చిన విధంగా ఏకపక్షంగా సభ్యులను సస్పెండ్ చేయడం సమంజసం కాదని అన్నారు.
పదేళ్ల ఆర్థిక లెక్కలు వెల్లడించాలని డిమాండ్
యూనియన్కు సంబంధించిన ఆస్తులు, నిధులు, ఆర్థిక లావాదేవీలపై సభ్యులకు పూర్తి వివరాలు తెలియజేయాలని మహిళా కార్మికులు డిమాండ్ చేశారు. యూనియన్కు సంబంధించిన ప్రాపర్టీ గురించి ప్రశ్నించినప్పుడు సరైన లెక్కలు, వివరాలు ఇవ్వకుండా, “అక్కడ బిందె ఉంది.. ఇక్కడ గ్లాస్ ఉంది.. అక్కడ ఫ్యాన్ ఉంది.. ఇక్కడ టేబుల్ ఉంది.. అదిగో కుర్చీ ఉంది” అంటూ ఎగతాళిగా సమాధానం ఇస్తున్నారని వారు ఆరోపించారు.
యూనియన్లో గత పదేళ్లుగా జరిగిన ఆర్థిక లావాదేవీలకు సంబంధించిన పూర్తి లెక్కలను సభ్యుల ముందుంచాలని కోరారు. ఆదాయ-వ్యయ వివరాలు, సభ్యులు చెల్లించే చందాలు, ఇతర మార్గాల్లో యూనియన్కు వచ్చే నిధులు, వాటి వినియోగం తదితర అంశాలపై స్పష్టత ఇవ్వాలని డిమాండ్ చేశారు. యూనియన్ నిధులు ఎలా ఖర్చవుతున్నాయో సభ్యులకు తెలియాల్సిన అవసరం ఉందని పేర్కొన్నారు.
‘ఏకపక్ష నిర్ణయాలు తీసుకుంటున్నారు’
యూనియన్ నిబంధనల ప్రకారం అధ్యక్షురాలు, కార్యదర్శి, క్యాషియర్తో పాటు కమిటీ సభ్యుల భాగస్వామ్యంతో కీలక నిర్ణయాలు తీసుకోవాల్సి ఉంటుందని సభ్యులు తెలిపారు. అయితే ప్రస్తుతం అధ్యక్షురాలు ఏకపక్షంగా నిర్ణయాలు తీసుకుంటున్నారని ఆరోపించారు.
కమిటీ ఆమోదం లేకుండానే తమను ప్రశ్నించిన సభ్యులపై సస్పెన్షన్ చర్యలు తీసుకుంటున్నారని, దీనివల్ల యూనియన్ సభ్యుల మధ్య విభేదాలు మరింత పెరుగుతున్నాయని అన్నారు. సస్పెన్షన్ల కారణంగా తమకు ఉపాధి పరంగా కూడా ఇబ్బందులు ఎదురవుతున్నాయని ఆవేదన వ్యక్తం చేశారు.
‘పనులు ఇవ్వొద్దంటూ ఒత్తిడి తెస్తున్నారు’
తమను ప్రశ్నించినందుకు కొంతమంది ప్రొడక్షన్ మేనేజర్లు, ప్రొడక్షన్ చీఫ్లకు ఫోన్లు చేసి సంబంధిత సభ్యులకు పనులు ఇవ్వవద్దని ఒత్తిడి తెస్తున్నారని మహిళా కార్మికులు ఆరోపించారు. రోజువారీ ఉపాధిపై ఆధారపడి జీవిస్తున్న తమపై ఇలాంటి చర్యలు తీవ్ర ప్రభావం చూపుతున్నాయని అన్నారు.
యూనియన్లోని సమస్యలను చర్చల ద్వారా పరిష్కరించాల్సిన బదులు, సభ్యులపై పోలీస్ ఫిర్యాదులు, కేసుల పేరుతో ఒత్తిడి తీసుకువస్తున్నారని ఆరోపించారు. తమకు ఉపాధి లేకుండా చేసే ప్రయత్నాలు జరుగుతున్నాయని, దీనివల్ల తమ కుటుంబాల జీవన పరిస్థితులు కూడా దెబ్బతింటున్నాయని ఆవేదన వ్యక్తం చేశారు.
‘మా కష్టార్జితానికి లెక్క అడుగుతున్నాం’
తమ జీవన పరిస్థితులను కూడా మహిళా కార్మికులు వివరించారు. పగలు, రాత్రి తేడా లేకుండా ప్రొడక్షన్ రంగంలో పనిచేస్తూ కుటుంబాలను పోషించుకుంటున్నామని తెలిపారు. చిన్న పిల్లలను ఇళ్ల వద్ద వదిలి పనులకు వస్తున్నామని, తమకు వచ్చే పరిమిత ఆదాయంతోనే కుటుంబ అవసరాలను తీర్చుకుంటున్నామని చెప్పారు.
ప్రతి ఏడాది ఒక్కొక్కరు రూ.5,000 చొప్పున యూనియన్కు చందా చెల్లిస్తున్నామని తెలిపారు. తాము కష్టపడి సంపాదించిన డబ్బు నుంచి చెల్లిస్తున్న చందాలకు లెక్క అడగడం తమ హక్కు అని అన్నారు.
“మేము కష్టపడి సంపాదించిన డబ్బుకు లెక్క అడుగుతున్నాం. అందుకు మమ్మల్ని సస్పెండ్ చేయడం, పనులు లేకుండా చేయడం ఎంతవరకు సమంజసం?” అని ప్రశ్నించారు. రోజువారీగా వచ్చే పరిమిత ఆదాయంతో పిల్లల చదువులు, కుటుంబ ఖర్చులు, ఇతర అవసరాలు తీర్చుకుంటున్న తమపై చర్యలు తీసుకోవడం వల్ల కుటుంబాలు ఆర్థిక ఇబ్బందులు ఎదుర్కొంటున్నాయని ఆవేదన వ్యక్తం చేశారు.
ఫిలిం ఛాంబర్, ఫెడరేషన్ పెద్దలు జోక్యం చేసుకోవాలి
తెలుగు సినీ అండ్ టీవీ ప్రొడక్షన్ మహిళా వర్కర్స్ యూనియన్లో నెలకొన్న వివాదాన్ని పరిష్కరించేందుకు తెలుగు ఫిలిం ఛాంబర్, ఫిలిం ఫెడరేషన్, చిత్ర పరిశ్రమకు చెందిన పెద్దలు వెంటనే జోక్యం చేసుకోవాలని సభ్యులు విజ్ఞప్తి చేశారు.
యూనియన్కు సంబంధించిన ఆర్థిక లావాదేవీలు, నిధుల వినియోగం, ఆస్తులు, స్థలం కొనుగోలు తదితర అంశాలపై పూర్తి పారదర్శకతతో వివరాలు వెల్లడించాలని డిమాండ్ చేశారు. యూనియన్ నిబంధనలను పాటిస్తూ కమిటీ సభ్యుల సమక్షంలో నిర్ణయాలు తీసుకోవాలని కోరారు.
అలాగే సభ్యుల మధ్య నెలకొన్న వివాదాలను చర్చల ద్వారా పరిష్కరించి, ఎలాంటి కక్ష సాధింపు చర్యలకు తావులేకుండా చూడాలని విజ్ఞప్తి చేశారు. తమపై సస్పెన్షన్లు, పనులు నిలిపివేయడం వంటి చర్యలు తీసుకోకుండా, తమకు నిరంతరం ఉపాధి లభించేలా చర్యలు తీసుకోవాలని కోరారు. యూనియన్లో నెలకొన్న సమస్యలకు సామరస్యపూర్వక పరిష్కారం చూపించి, మహిళా కార్మికుల ప్రయోజనాలను కాపాడాలని వారు ఫిలిం ఛాంబర్, ఫెడరేషన్ పెద్దలను కోరారు.