బీసీల హక్కులు సాధించే వరకు పోరాటం ఆగదు: బోడె రామచంద్ర యాదవ్
రెండో రోజుకు చేరిన బోడె రామచంద్ర యాదవ్ ‘ధర్మ దీక్ష’
బీసీల సమగ్ర అభ్యున్నతిని లక్ష్యంగా ప్రభుత్వం ముందు 5 కీలక డిమాండ్లను ఉంచిన బోడె రామచంద్ర యాదవ్
అమరావతి: బీసీల న్యాయమైన హక్కుల సాధనే లక్ష్యంగా భారత యువజన చైతన్య పార్టీ (BYCP) అధ్యక్షుడు బోడె రామచంద్ర యాదవ్ చేపట్టిన ఆమరణ నిరాహార ధర్మ దీక్ష రెండో రోజుకు చేరుకుంది. బీసీలకు రాజ్యాధికారం దక్కాలనే సంకల్పంతో ప్రారంభమైన ఈ దీక్ష రాష్ట్రవ్యాప్తంగా రాజకీయ, సామాజిక వర్గాల్లో చర్చనీయాంశంగా మారింది.
ప్రముఖుల సంఘీభావం
ఈ ధర్మదీక్షకు వివిధ సామాజిక, రాజకీయ సంస్థలు, కుల సంఘాలు, ప్రజా ప్రతినిధుల నుంచి విస్తృత మద్దతు లభిస్తోంది. తొలి రోజున బీసీ కమిషన్ పితామహుడు బి.పి. మండల్ మనుమడు సూరజ్ మండల్, మహాత్మా జ్యోతిరావు పూలే మునిమనుమరాలు నీతాతాయి రమాకాంత్ పూలే స్వయంగా దీక్షా శిబిరానికి హాజరై సంఘీభావం ప్రకటించారు.
అలాగే మాజీ ఎంపీ విజయసాయిరెడ్డి సహా పలువురు రాజకీయ ప్రముఖులు సామాజిక మాధ్యమాల ద్వారా తమ మద్దతును వెల్లడించారు. సమాజ్వాదీ పార్టీ, ఆర్జేడీ ప్రతినిధులు, జాతీయ యాదవ హక్కుల పోరాట సమితి నాయకులు, మున్నూరు కాపు, పద్మశాలి, రజక, ముదిరాజ్ తదితర కుల సంఘాల ప్రతినిధులు దీక్షా శిబిరాన్ని సందర్శించి సంఘీభావం తెలిపారు.
ప్రభుత్వం ముందున్న ఐదు ప్రధాన డిమాండ్లు
బీసీల సమగ్ర అభ్యున్నతిని లక్ష్యంగా పెట్టుకుని బోడె రామచంద్ర యాదవ్ ప్రభుత్వం ముందు 5 కీలక డిమాండ్లను ఉంచారు:
బీసీ రక్షణ చట్టం: బీసీల రక్షణకు ప్రత్యేక చట్టం తీసుకురావాలి
రాజధానిలో భూమి కేటాయింపు: అమరావతిలో బీసీలకు 1000 ఎకరాల భూమి కేటాయించాలి
సమగ్ర కులగణన: రాష్ట్రవ్యాప్తంగా కులగణన చేపట్టాలి
44% రిజర్వేషన్లు: విద్య, ఉద్యోగాలు, స్థానిక సంస్థలు, చట్టసభల్లో బీసీలకు 44 శాతం రిజర్వేషన్లు కల్పించాలి
బీసీ కార్పొరేషన్ల బలోపేతం: తగిన నిధులు కేటాయించి బీసీ కార్పొరేషన్లను బలోపేతం చేయాలి
ధర్మయుద్ధం బీసీల ఆత్మగౌరవం కోసం
ఈ సందర్భంగా బోడె రామచంద్ర యాదవ్ మాట్లాడుతూ,
“ఇది వ్యక్తిగత ప్రయోజనాల కోసం చేస్తున్న పోరాటం కాదు. బీసీల ఆత్మగౌరవం కోసం చేస్తున్న ధర్మయుద్ధం. గతంలో ముఖ్యమంత్రి చంద్రబాబు నాయుడు ఇచ్చిన హామీలను అమలు చేయాలని కోరుతున్నాం. ప్రభుత్వం స్పందించే వరకు అవసరమైతే ప్రాణత్యాగానికైనా సిద్ధమే కానీ వెనక్కి తగ్గేది లేదు,” అని స్పష్టం చేశారు.
గతంలో అధికారంలో ఉన్న వైసీపీ ప్రభుత్వం కూడా బీసీలకు తగిన న్యాయం చేయలేదని ఆయన విమర్శించారు. ఫిబ్రవరి 28న నిర్వహించిన ‘బీసీ సింహగర్జన’ సభలో ఈ డిమాండ్లను ప్రస్తావించినప్పటికీ ప్రభుత్వం స్పందించకపోవడంతోనే ఆమరణ నిరాహార దీక్షకు దిగాల్సి వచ్చిందన్నారు.
బీసీల ఐక్యతకు ప్రతీకగా మారుతున్న ఈ ధర్మదీక్ష, రాబోయే రోజుల్లో రాష్ట్ర రాజకీయాల్లో కీలక పరిణామాలకు దారితీయొచ్చని విశ్లేషకులు అభిప్రాయపడుతున్నారు. ఈ నిరాహార దీక్ష సామాజిక మాధ్యమాల్లో కూడా విస్తృత చర్చకు దారి తీస్తూ X (Twitter)
లో ట్రెండింగ్లో నిలిచింది.